احمد: اللاحليمة، لباس، كيف دايرة؟
اللاحليمة: لباس أولدي. فين غبرتي؟
احمد: ظروف العمل ومشاكل الحياة. دايمن تنسول عليك اللاعيشة.
اللاحليمة: تتقولها ليا. كيف دايرين لوليدات؟ ومرتك لطيفة؟
احمد: تتعدي مع الوقت. تتسلم عليك بزاف.
اللاحليمة: سلم عليها. راه تنتسناها دوز عندي.
احمد: الحومة سخونة. والسماسرية كثار.
اللاحليمة: كثار وبزاف. غير هاذ المرة، حشمانين. تيزاوكو فينا وعينيهوم فالارض. راه ولد عيشة حتى هو مشارك معاهم. وللى واحد آخر. لابس مزيان، وريحة شراب تتضرب منو. كان تيشرب غير لنكول.
احمد: علاش ما شركتي معاهم؟
اللاحليمة: حشومة عليك. انا؟ وخا نبقا بالجوع.
احمد: علاش؟ تيخلصو مزيان. حسن من لباطرون ديالك. شحال تيعطيك؟
اللاحليمة: لباطرون ولد لحرام. مجرم. تيمص دم ديالنا. علاه انا عجبني لحال معاه؟ طرف ديال لخبز هو للي خلاني نحدر الراس. غير انا ما نبيع راسي لسمسارة. ولاد لحرام. تيكذبو علينا ديمن.
احمد: راه غادي يجيو شفارة خرين. صوتي على لمزيانين. راجل مينة، ضريف.
اللاحليمة: الله يجيبك على خير. واش تتضحك علي. راه طيحت سناني مع هاذ ولاد لحرام. راجل مينة شفار حتى هو، وخى ضريف. تيصلي وتيذبح عباد الله. انا للي مجربة اسي احمد. راك غشيم.
احمد: أنا ما مسجل ما تنصوت. شفارة كلهم. راه عرفتيني امي حليمة. واش عقلتي ملي شدوني؟
اللاحليمة: شحال بكات امك. احنا ديمن كنا معاك. سول امك.
احمد: اعرف. راكوم عزاز. واش هاد ديري دابا؟
اللاحليمة: باح. يعاودو لراسهم كلهم. وراه ماشي غير انا. راه جيران حتى هما. عيالات ورجال. عقنا بهم. كلهم ولاد لحرام. شفارة. صغار وكبار.
احمد: راه كاين للي تيقاطع الانتخابات. ما جاو عندكم؟
اللاحليمة: ما جا عندنا حد. وعلاه غادي نتسناوهم يجيو عندنا؟ حنا مقاطعين اليوم وغدا. واش حنا كوانب؟ راه عقنا. خصهم يعيقو حتى هما. ونتا، علاش ما ترشحتي؟
احمد: انا؟ مع شفارة؟ حشومة عليك مي حليمة. انا غادي نقلب كلشي.
اللاحليمة: غير بشوية عليك. قالوها قبل منك. وباعو لماتش.
احمد: معاك الحق. غير لابدا من تضحية. خصنا نضحيو.
اللاحليمة: حنا معاك. غير كون "راجل".
شارك هذا الموضوع على: ↓
0 تعليقات المدونة
